Sámi ovddidanfoandda doarjjaortnegiid árvvoštallan

Dán árvvoštallamis geahčadit Sámi ovddidanfoandda váikkuhangaskaomiid geavaheami áigodagas 2002-2006. Árvvoštallamis leat mielde njeallje bušeahttapoastta, mat leat eanadoallu, guolásteapmi, duodjedoaimmat ja eará ealáhusat. Dán áigodagas lea juolluduvvon 86,6 millijuvnna prošeavttaide mat gullet ealáhusovddideapmái. Árvvoštallamis kártet dan movt Sámi ovddidanfoanda lea doaibman foandda iežas mihttomeriid ektui ja makkár bohtosiid dahje ovdáneami leat olahan foandda doarjjaortnegiiguin. Lea čađahuvvon gažadaniskkadeapmi mii sáddejuvvui buohkaide geat dien áiggis leat ohcan foanddas doarjaga. Mii leat hábmen rávvagiid movt foandda sáhtášii rievdadit. Dan dahkat gažadaniskkadallama, ohcamušaid datafiillaid analysaid ja hálddahusbargiid ja politihkkáriid jearahallamiid vuođul, ja maiddái muhtun ságastallamiid vuođul mat mis leamaš suohkaniid hálddahusbargiiguin. Rávvagat gusket ohcamušaid registreremiidda, ulbmilii ja doaimmaide, raporteremii, politihkkii ja vuoruhemiide, diehtojuohkimii mii addojuvvo ohcciide, suohkaniid oktavuođaide ja dasa mii guoská mielderuhtadeapmái /ovttasbargui.