DSA-info Tilsyn med handtering av uønskte hendingar ved sjukehus som driv stråleterapi

Mellom mars 2020 og mars 2021 vart det gjennomført tilsyn med alle ni stråleterapieiningar i Norge, der temaet var «Handtering av uønskte hendingar». DSA avdekka avvik ved to av sjukehusa, men hovudinntrykket er at sjukehusa har god kontroll og gode system for å registrere og følge opp uønskte hendingar innan stråleterapi. DSA har tidlegare gjennomført omfattande systemtilsyn med sjukehusa som tilbyr strålebehandling [2]. Denne gongen har vi hatt eit meir avgrensa tema og sett fokus på korleis sjukehusa arbeider med handtering av uønskte hendingar. Vi har sett både på læringsaspektet og korleis pasienten vert teken hand om.